मंचर बसस्थानकातील सराईत चोरट्यांचा पर्दाफाश; 6.92 लाखांचा मुद्देमाल जप्त, चार आरोपी जेरबंद

मंचर ता. १५ : मंचर बसस्थानक परिसरात गर्दीचा फायदा घेत प्रवाशांच्या दागिन्यांवर डल्ला मारणाऱ्या सराईत चोरट्यांच्या टोळीचा मंचर पोलिसांनी पर्दाफाश केला आहे. पोलिसांनी चार आरोपींना अटक करत तब्बल 6 लाख 92 हजार 480 रुपयांचा मुद्देमाल जप्त केला असून, आरोपींकडून तीन चोरीचे गुन्हे उघडकीस आले आहेत. या धडक कारवाईमुळे बसस्थानक परिसरात चोरी करणाऱ्या टोळ्यांचे धाबे दणाणले आहेत.

मिळालेल्या माहितीनुसार, मंचर येथील बसस्थानकात प्रवासी बसमध्ये चढत असताना किंवा गर्दीत उभे असताना त्यांच्या अंगावरील दागिने व मौल्यवान वस्तू चोरण्याच्या घटना सातत्याने घडत होत्या. याच पार्श्वभूमीवर 18 जून 2026 रोजी सकाळी सुमारे 11 वाजण्याच्या सुमारास मंचर एसटी स्थानकात नाशिक-पुणे बसमध्ये चढत असलेल्या शकुंतला मनोहर थिटे (वय 61, रा. मुकुंदवाडी रोड, मंचर) यांच्या हातातील सोन्याचे बांगडे अज्ञात चोरट्यांनी गर्दीचा फायदा घेत लंपास केले. याप्रकरणी मंचर पोलीस ठाण्यात गुन्हा दाखल करण्यात आला होता.

पोलिसांची गुप्त माहिती आणि सापळा यशस्वी

या गुन्ह्याचा तपास सुरू असताना मंचर पोलीस स्टेशन व स्थानिक गुन्हे शाखेच्या पथकाने तांत्रिक आणि गोपनीय माहितीच्या आधारे संशयितांचा शोध सुरू केला. दरम्यान, मंचर पोलिसांचे पथक रात्री गस्त घालत असताना आंबेगाव तालुक्यातील एकलहरे गाव परिसरात एचपी पेट्रोल पंपाजवळ बंद पडलेल्या मंगल कार्यालयाशेजारी संशयास्पदरीत्या उभी असलेली MH-46-W-3184 क्रमांकाची एर्टिगा कार आढळली.

कारमध्ये चार जण संशयास्पद हालचाली करत असल्याचे दिसून आल्याने पोलिसांनी त्यांची चौकशी केली. चौकशीत त्यांनी उडवाउडवीची उत्तरे दिल्याने पोलिसांचा संशय अधिक बळावला. त्यानंतर त्यांना ताब्यात घेऊन सखोल चौकशी केली असता चोरीच्या गुन्ह्यांची कबुली मिळाली.

अटक आरोपी

• अमोल सुरेश टिंडंगे (वय 40)
• कपिल सुरेश टिंडंगे (वय 38)
• दीपक वतन आभंगे (वय 48)
• राजेश दीपक गांगंगे (वय 58)

हे सर्व आरोपी सुभाषवाडी, चांद्रपाडा, अंबरनाथ, जि. ठाणे येथील रहिवासी असून सराईत गुन्हेगार असल्याचे तपासात समोर आले आहे.

आरोपींवर आधीच 15 चोरीचे गुन्हे!

पोलिस तपासात धक्कादायक बाब समोर आली असून, अटक आरोपींवर यापूर्वी कल्याण परिसरात एकूण 15 चोरीचे गुन्हे दाखल असल्याचे निष्पन्न झाले आहे. त्यामुळे ही टोळी राज्यातील विविध बसस्थानके आणि गर्दीच्या ठिकाणी प्रवाशांना लक्ष्य करत असल्याचा संशय पोलिसांनी व्यक्त केला आहे.

6.92 लाखांचा मुद्देमाल जप्त

अटक आरोपींकडून पोलिसांनी –

• 1 लाख 92 हजार 480 रुपये किमतीचे 4 तोळे सोन्याचे बांगडे
• गुन्ह्यात वापरलेली 5 लाख रुपये किमतीची एर्टिगा कार (MH-46-W-3184)

असा एकूण 6 लाख 92 हजार 480 रुपयांचा मुद्देमाल जप्त केला आहे.

तीन गुन्ह्यांची उकल

पोलिस तपासात आरोपींनी केलेले खालील तीन गुन्हे उघडकीस आले आहेत –

1. मंचर पोलीस स्टेशन गुन्हा रजिस्टर क्र. 177/2026
2. खेड पोलीस स्टेशन गुन्हा रजिस्टर क्र. 489/2024
3. खेड पोलीस स्टेशन गुन्हा रजिस्टर क्र. 111/2026

वरिष्ठांच्या मार्गदर्शनाखाली कारवाई

ही कारवाई पोलीस अधीक्षक संदीप गिल्ल, अपर पोलीस अधीक्षक शुभम कुमार, उपविभागीय पोलीस अधिकारी खेड विभाग, मंचर पोलीस स्टेशनचे पोलीस निरीक्षक श्रीकांत कंकाळ तसेच स्थानिक गुन्हे शाखेच्या मार्गदर्शनाखाली करण्यात आली.

कारवाईत पोलीस उपनिरीक्षक यादव, पोलीस हवालदार शेखर भोईर, संजय नाडेकर, सुदाम घोडे, नंदकुमार आढरी, योगेश रोडे, अजित पवार, हनुमंत ढोबळे, सुनील काटे, अविनाश ढवळी तसेच स्थानिक गुन्हे शाखेचे अतुल डेरे, संदीप फड आणि इतर कर्मचाऱ्यांनी महत्त्वाची भूमिका बजावली.

प्रवाशांसाठी पोलिसांचे आवाहन

बसस्थानके, रेल्वे स्थानके आणि इतर गर्दीच्या ठिकाणी प्रवास करताना मौल्यवान दागिने व वस्तूंची काळजी घ्यावी, संशयास्पद हालचाली आढळल्यास तात्काळ पोलिसांशी संपर्क साधावा, असे आवाहन मंचर पोलिसांनी केले आहे.