मंचरमध्ये भगवान श्री विश्वकर्मा प्रकट दिन उत्साहात

मंचर प्रतिनिधी : भगवान श्री विश्वकर्मा प्रकट दिनानिमित्त मंचर शहरात लोहार विकास संस्था, आंबेगाव तालुका आणि जेष्ठ नेते संजय थोरात यांच्या संयुक्त विद्यमाने विविध धार्मिक व सामाजिक उपक्रमांचे आयोजन करण्यात आले. या उपक्रमाला समाजबांधवांसह नागरिकांचा उत्स्फूर्त प्रतिसाद मिळाला.

कार्यक्रमाची सुरुवात मान्यवरांच्या हस्ते भगवान श्री विश्वकर्मा यांच्या प्रतिमेचे पूजन व आरती करून करण्यात आली. यावेळी लोहार समाजातील बांधव, संस्थेचे पदाधिकारी तसेच विविध क्षेत्रातील मान्यवर मोठ्या संख्येने उपस्थित होते.

विश्वकर्मा प्रकट दिनानिमित्त सामाजिक उपक्रम

भगवान श्री विश्वकर्मा यांना स्थापत्यशास्त्र, वास्तुकला, शिल्पकला व विविध कारागिरीचे अधिष्ठाता देव मानले जाते. लोहार, सुतार, सोनार, शिल्पकार, अभियंते तसेच विविध तांत्रिक व्यवसायांशी संबंधित समाजबांधवांसाठी भगवान श्री विश्वकर्मा हे श्रद्धास्थान आहे. याच श्रद्धेच्या पार्श्वभूमीवर यंदाच्या प्रकट दिनाचे औचित्य साधून केवळ धार्मिक कार्यक्रम न करता नागरिकांना शासकीय योजनांचा प्रत्यक्ष लाभ मिळवून देण्याचा सामाजिक उपक्रम राबविण्यात आला.

८८ नागरिकांना विविध योजनांचा मोफत लाभ

मंचर शहरातील जनसेवा जनसंपर्क कार्यालयात नागरिकांसाठी केंद्र व राज्य शासनाच्या विविध योजनांशी संबंधित सेवा उपलब्ध करून देण्यात आल्या. नागरिकांना योजनांची माहिती देण्याबरोबरच आवश्यक कागदपत्रे व प्रक्रियेबाबत मार्गदर्शन करण्यात आले. यामध्ये नवीन मतदार नाव नोंदणी, महा आयडी कार्ड, आयुष्मान भारत कार्ड, बांधकाम कामगार योजना, संजय गांधी योजना, श्रावणबाळ योजना, स्मार्ट रेशन कार्ड यांसह विविध शासकीय योजनांचा समावेश होता. या उपक्रमातून एकूण ८८ नागरिकांना विविध शासकीय योजनांचा नि:शुल्क लाभ मिळवून देण्यात आला.

यावेळी जेष्ठ नेते संजय थोरात म्हणाले, “भगवान श्री विश्वकर्मा प्रकट दिनाच्या निमित्ताने लोहार विकास संस्थेच्या माध्यमातून अतिशय चांगला सामाजिक उपक्रम राबविण्यात आला आहे. मायबाप जनतेची सेवा करणे आणि त्यांना केंद्र व राज्य शासनाच्या विविध योजनांचा नि:शुल्क लाभ मिळवून देणे हे आमचे कर्तव्य आहे.”

शासनाच्या अनेक योजना उपलब्ध असल्या तरी माहितीअभावी अनेक नागरिक या योजनांपासून वंचित राहतात. त्यामुळे नागरिकांना योजनांची माहिती मिळावी आणि त्यांना प्रत्यक्ष लाभ मिळावा, या उद्देशाने भविष्यातही अशा प्रकारचे उपक्रम सातत्याने राबविण्यात येतील, असे त्यांनी सांगितले.

लोहार विकास संस्थेचे महाराष्ट्र राज्य अध्यक्ष मधुकर (आबासाहेब) लोखंडे यांनी जनसेवक संजय भाऊ थोरात यांचे आभार व्यक्त केले. ते म्हणाले, “संजय भाऊ थोरात हे नेहमीच आमच्या समाजाच्या पाठीशी खंबीरपणे उभे राहतात. समाजासाठी त्यांचे मोठे योगदान आहे. समाजबांधवांसाठी विविध उपक्रमांना त्यांनी नेहमीच सहकार्य केले आहे. त्यांचे हे योगदान समाज कधीही विसरणार नाही. नागरिकांनी शासनाच्या विविध योजनांचा लाभ घ्यावा.”

या कार्यक्रमाला जेष्ठ नेते संजय थोरात, लोहार विकास संस्थेचे महाराष्ट्र राज्य अध्यक्ष मधुकर (आबासाहेब) लोखंडे, आंबेगाव तालुका अध्यक्ष रामदास जयवंत लोखंडे, तसेच संस्थेचे पदाधिकारी, समाजबांधव आणि विविध क्षेत्रातील मान्यवर उपस्थित होते.

कार्यक्रमाचे सूत्रसंचालन नवनाथ थोरात यांनी केले. शेवटी रामदास जयवंत लोखंडे यांनी उपस्थितांचे आभार मानले.

यावेळी कालिदास गांजाळे, सुनीत थोरात, लक्ष्मण कळसे, अमोल पोपळघट, सचिन लोखंडे, अरुण नन्नवरे, वसंत लोखंडे, अनिकेत लोखंडे, संभाजी देशमुख, विलास पडघमकर, विठ्ठल लोखंडे, मयूर लोखंडे, गणेश दाते, प्रभाकरभाऊ लोखंडे, मनोज मु. लोखंडे, रमेश पडघमकर, प्रकाश थोरात, रामदास लोहार, मारुती लोखंडे, सुलोचना लोहार, ज्योती शिंदे, विष्णू पोपळघट, ज्ञानेश्वर ढगे, सुनील थोरात, संतोष चिखले यांच्यासह लोहार समाजातील बांधव व मान्यवर मोठ्या संख्येने उपस्थित होते.

श्रद्धेला सामाजिक उपक्रमाची जोड देत नागरिकांना शासनाच्या विविध योजनांचा प्रत्यक्ष लाभ मिळवून देण्यात आल्याने मंचरमधील भगवान श्री विश्वकर्मा प्रकट दिनाचा कार्यक्रम विशेष ठरला.