अजय घुले यांची रयत शिक्षण संस्थेच्या पुणे विभागीय समन्वय समितीवर निवड; मंचर परिसरातून अभिनंदनाचा वर्षाव

मंचर | प्रतिनिधी

मंचरचे सुपुत्र, यशस्वी उद्योजक, शरद सहकारी बँकेचे संचालक आणि सामाजिक बांधिलकी जपणारे नेतृत्व म्हणून ओळख असलेल्या अजय घुले यांची आशिया खंडातील सर्वात मोठ्या शैक्षणिक संस्थांपैकी एक असलेल्या रयत शिक्षण संस्थेच्या पश्चिम विभाग, पुणे विभागीय समन्वय समितीच्या सदस्यपदी निवड झाल्याने मंचरसह संपूर्ण आंबेगाव तालुक्यात आनंदाचे वातावरण निर्माण झाले आहे. त्यांच्या निवडीबद्दल विविध सामाजिक, शैक्षणिक, राजकीय आणि सहकार क्षेत्रातील मान्यवरांकडून अभिनंदनाचा वर्षाव होत आहे.

रयत शिक्षण संस्थेचे संस्थापक कर्मवीर भाऊराव पाटील यांच्या विचारांचा वारसा पुढे नेत ग्रामीण भागातील विद्यार्थ्यांना दर्जेदार शिक्षण उपलब्ध करून देण्यासाठी संस्था सातत्याने कार्यरत आहे. अशा प्रतिष्ठित संस्थेच्या पुणे विभागीय समन्वय समितीवर अजय घुले यांची निवड होणे ही त्यांच्या कार्याची आणि समाजातील स्वीकारार्हतेची मोठी पावती मानली जात आहे.

अजय घुले यांनी उद्योग क्षेत्रात उल्लेखनीय यश संपादन करताना सामाजिक जबाबदारीचे भान कायम जपले आहे. गरजू, वंचित आणि अडचणीत असलेल्या नागरिकांना वेळोवेळी मदतीचा हात देत त्यांनी समाजसेवेचा आदर्श निर्माण केला आहे. लोकांशी असलेला त्यांचा जिव्हाळ्याचा संपर्क, सर्वसामान्यांच्या प्रश्नांप्रती असलेली संवेदनशीलता आणि सकारात्मक दृष्टिकोन यामुळे त्यांनी समाजात एक वेगळी ओळख निर्माण केली आहे.

माजी गृहमंत्री दिलीपराव वळसे पाटील यांचे विश्वासू सहकारी तसेच शरद सहकारी बँकेचे अध्यक्ष देवेंद्र शहा यांचे निकटवर्तीय म्हणूनही अजय घुले यांचे नाव आदराने घेतले जाते. सहकार, सामाजिक आणि शैक्षणिक क्षेत्रातील विविध उपक्रमांमध्ये त्यांनी सातत्याने सक्रिय सहभाग नोंदवत समाजहिताची भूमिका निभावली आहे.

संस्कार फाउंडेशनच्या माध्यमातून त्यांनी मंचर शहरातील क्रीडा संकुल परिसरात स्वखर्चाने निसर्गरम्य आणि प्रेरणादायी वातावरण निर्माण केले आहे. याशिवाय शिक्षण, क्रीडा, कला, सामाजिक कार्य आणि विविध क्षेत्रांत उल्लेखनीय कामगिरी करणाऱ्या व्यक्तींचा गौरव करून समाजातील सकारात्मक कार्याला प्रोत्साहन देण्याचे कार्य त्यांनी सातत्याने केले आहे.

संयमी स्वभाव, शांत आणि संतुलित व्यक्तिमत्त्व, तसेच चेहऱ्यावर कायम असणारे प्रसन्न हास्य ही अजय घुले यांची खास ओळख मानली जाते. समाजातील विविध घटकांना एकत्र घेऊन विकासाच्या दिशेने वाटचाल करण्याची त्यांची कार्यशैली सर्वांना भावणारी आहे.

रयत शिक्षण संस्थेच्या पुणे विभागीय समन्वय समितीवर झालेली त्यांची निवड ही केवळ वैयक्तिक सन्मानाची बाब नसून मंचर आणि आंबेगाव तालुक्याच्या सामाजिक व शैक्षणिक क्षेत्रासाठी अभिमानाची घटना असल्याची भावना सर्व स्तरांतून व्यक्त होत आहे. त्यांच्या अनुभवाचा आणि नेतृत्वगुणांचा लाभ संस्थेच्या शैक्षणिक कार्याला मिळणार असून ग्रामीण भागातील विद्यार्थ्यांसाठी अधिक प्रभावी आणि नाविन्यपूर्ण उपक्रम राबविण्यास या निवडीमुळे बळ मिळेल, असा विश्वास व्यक्त केला जात आहे.

दरम्यान, या निवडीबद्दल माजी मंत्री दिलीपराव वळसे पाटील, शरद सहकारी बँकेचे अध्यक्ष देवेंद्र शहा यांच्यासह आंबेगाव तालुक्यातील अनेक मान्यवर, सामाजिक कार्यकर्ते, उद्योजक, शिक्षक आणि नागरिकांनी अजय घुले यांचे अभिनंदन करून पुढील वाटचालीस शुभेच्छा दिल्या आहेत.