पुणे-नाशिक रेल्वे मार्ग बदलणाऱ्यांना खा. अमोल कोल्हे आक्रमक; झारीतील शुक्राचार्यांना चांगलेच सुनावले

209 1 minute read

मंचर : पुणे-नाशिक रेल्वे प्रकल्पाच्या मूळ मार्गाचा प्रश्न पुन्हा एकदा ऐरणीवर आला असून, शिरूर लोकसभा मतदारसंघाचे खासदार डॉ. अमोल कोल्हे यांनी या मुद्द्यावर आक्रमक भूमिका घेतली आहे. पुणे-नाशिक रेल्वे ही मूळ मार्गानेच व्हावी, अशी ठाम भूमिका त्यांनी घेतली असून मार्ग बदलण्याच्या निर्णयामागील कारणांचा शोध घेण्याची मागणी त्यांनी केली आहे.

रेल्वेमंत्री अश्विनी वैष्णव यांनी अलीकडेच जीएमआरटीच्या (GMRT) आक्षेपांमुळे पुणे-नाशिक रेल्वे प्रकल्प मूळ मार्गाने राबविणे शक्य नसल्याचे स्पष्ट केले होते. मात्र, या स्पष्टीकरणानंतर स्थानिक नागरिक, शेतकरी, व्यापारी, विद्यार्थी आणि विविध सामाजिक संघटनांमध्ये तीव्र नाराजी पसरली आहे. त्यामुळे आता या प्रश्नावर मोठे आंदोलन उभे राहिले आहे.

खासदार अमोल कोल्हे यांनी यापूर्वीच या प्रकल्पासंदर्भात अनेक अभ्यासपूर्ण मुद्दे मांडले होते. त्यांनी शासनाकडे विविध पर्याय सुचविताना प्रकल्पामुळे होणारे सामाजिक, आर्थिक आणि औद्योगिक फायदे अधोरेखित केले होते. त्याचबरोबर रेल्वेचा मूळ मार्ग कायम ठेवण्यासाठी पर्यायी उपाययोजनाही सुचविल्या होत्या.

दरम्यान, शासनाने योग्य वेळी या सूचनांचा गांभीर्याने विचार केला असता, तर आज ही परिस्थिती उद्भवली नसती, असे मत अनेक नागरिक व्यक्त करत आहेत. त्यामुळे आता सुरू झालेल्या आंदोलनाला अधिक तीव्र स्वरूप येण्याची शक्यता वर्तवली जात आहे.

खासदार अमोल कोल्हे यांनी या संपूर्ण प्रकरणात “झारीतील शुक्राचार्य कोण?” असा थेट सवाल उपस्थित केला आहे. पुणे-नाशिक रेल्वे प्रकल्पाचा मार्ग बदलण्यासाठी नेमके कोण प्रयत्नशील होते, याचा खुलासा करण्याची मागणी त्यांनी केली आहे. जनतेच्या विकासाच्या मार्गात अडथळे निर्माण करणाऱ्यांची नावे समोर आणली जावीत, अशी मागणीही त्यांनी केली.

पुणे, आळंदी, चाकण, राजगुरुनगर, मंचर, नारायणगाव, आळेफाटा, संगमनेर आणि सिन्नर या भागांतील नागरिकांनीही रेल्वेचा मूळ मार्ग कायम ठेवण्याची मागणी केली आहे. या मार्गामुळे उद्योग, शिक्षण, शेती आणि रोजगाराच्या नव्या संधी निर्माण होतील, असा विश्वास व्यक्त करण्यात येत आहे.

आता या प्रश्नावरून राजकीय वातावरण तापले असून, पुणे-नाशिक रेल्वेचा मूळ मार्ग कायम राहणार की शासन नवा पर्याय स्वीकारणार, याकडे संपूर्ण राज्याचे लक्ष लागले आहे.

मुख्य मुद्दे :